Filmska ikona Odri Hepbern bila je poznata po tome što je umjela da pronađe ljepotu u jednostavnosti. U kuhinji je bila poznata po jednostavnim, ali ukusnim receptima. Jedan od njih bio je njen omiljeni ljetnji desert od samo četiri sastojka. Ovo jelo toliko je jednostavno da je njegov glavni sastojak, svježa breskva, bez sumnje u centru pažnje.
Kod ovog jednostavnog i osvježavajućeg deserta Hepbern je dopuštala da sastojci odrade sav posao. Tokom lijene ljetnje večeri teško je zamisliti bolju poslasticu koju možete brzo pripremiti i odmah u njoj uživati. Ovo bi lako mogao postati vaš omiljeni recept kada poželite nešto slatko, a jednostavno.
U knjizi „Odri kod kuće: Uspomene iz kuhinje moje majke“, njen sin Luka Doti prisjeća se brojnih trenutaka iz majčine kuhinje, uključujući i njen omiljeni ljetnji desert od breskvi.
Kako se priprema salata od breskvi Odri Hepbern:
Za pripremu ovog deserta Hepbern je gulila šest breskvi i sjekla ih na kriške. Zatim bi ih pomiješala sa tri kašike šećera i sokom jednog limuna.
Nakon što bi breskve odležale u toj smjesi oko sat vremena, dodala bi svježe listove mente i servirala ih na velikom tanjiru.
Iako je ovaj recept odličan i sam po sebi, postoji nekoliko načina da ga dodatno obogatite. Kako je jedan korisnik komentarisao na Instagramu, ova salata od breskvi mogla bi biti odličan fil za pitu od breskvi.
Odlično bi se, takođe, uklopila uz svježe umućen šlag ili sladoled od vanile. Možete dodati i drugo sezonsko voće koje imate u frižideru, poput jagoda ili trešanja.
Ipak, u ljetnjoj večeri kada vam se ne radi ništa osim da se izležavate na terasi i uživate u dugim sunčanim satima, možda je najbolje preskočiti sve dodatke i zadržati recept što jednostavnijim.
Uostalom, upravo je to i bila Hepbernina ideja.
