Iako abandonata sa bokeških trpeza ROŽADA je bila sastavni dio i bokeške kužine. Među gastronomima, meštrima od kužine Jadrana vječita gvera čija je delicija.
Dubrovčani tvrde da je njihova, zovu je rozata jer glavna aroma je rožulin (liker od ruža).
I oko toga je kontrestavanje kako se parića rožulin ili rozulin.
Pravi se od ruže stolisnice (Rosa centifolia). U Dubrovniku je poznata i kao "vonjača" ili "hlapača".
Jedni tvrde da se spravlja tako što se latice stave u stakleni važ sa cukrom, da odstoje tri mjeseca na suncu, pa se doda alkohol. Drugi pak da se odma dodaje i rakija u latice sa cukrom.
Svakako rožadi daje poseban tonj po čemu je unikatna.
Može se naći kao delicija i u latinoameričkim kužinama, ali npr. sa kanelom kao aromatom. (Na Kubi kao “Flan”, ali se parića sa kondenzovanim mlijekom).
Nimalo pedava za parićat, a prava delicija. I vrlo jeftina. Kako bi rekli, nije je kums parićat.
Prvo se na špaher, u teću istopi cukar i sa karamelom se oblože stijenke teće. Kad se karamel stisne uspe se bićerin rožulina.
U terinu se žbate jaja sa ručnom batilicom koliko da se cukar otopi a da se baćenjem ne napravi pjena jer rožata mora bit kompaktna bez mjehurića vazduha i doda se mlijeko.
Zbaćenu smjesu uliti u teću.
Teću staviti u veću teću u koju prethodno izručimo vruću vodu i u rernu od špahera tri kvarta od ure do ure, istovremeno peć’ i kuvat.
Jer se peče u rernu, a kuva u kipućoj vodi. Kad je gotova dobro je ohladiti u frižider, uru do dvije, i okrenut je na gvantjeru ili veći pjat.
Rićeta rožade je osim rožulina, u smjesu dodati gratanu koru naranče i (ili) limuna i vanilin cukar.
Meni je gušt dodat po pola kupice maraskina, ruma i kruškovca.
Svako po svom guštu može dodavat arome koje voli.
Za ljetnji stađon osvježavajuća studena delicija.
Rićeta:
Za karamel je dovoljno 5-6 ožica cukra.
Za rožadu koliko jaja toliko ožica cukra. Ako parićate sa 5 jaja dosta je kvarat litre mlijeka, a za 10 jaja po’ litre mlijeka.
Ko nije provao, neka prova. I guštajte u kužinanju, obradujte famelju i prijatelje.
Pravo osvježenje iza pižuleta poslije objeda.
Za gvarniciju možete koje pero mente kod posluženja.
Prijatno!
