Vlasnik picerije Rafaelo Stipa izboden je sinoć u svom lokalu u Ređo Emiliji, a policija je tokom noći uhapsila muškarca za kojeg se sumnja da ga je ubio, javlja italijanska agencija Ansa.
Osumnjičeni je pronađen oko dva sata poslije ponoći.
Prema prvim informacijama iz istrage, riječ je o stranom državljaninu i redovnom gostu picerije. Navodno je ušao u lokal tražeći besplatnu picu. Vlasnik mu je odgovorio: „Već sam ti dao tri besplatne pice, sada je dosta.“ Nakon toga ga je muškarac navodno napao nožem, usmrtivši vlasnika i povrijedivši njegovu sestru, a zatim pobjegao.
Napad se dogodio sinoć nešto poslije 22.30 časova u piceriji Jogi, u ulici Via Gran Saso d'Italia, u južnom dijelu Ređo Emilije, nedaleko od bolnice.
Stipa je imao oko 60 godina. Bio je porijeklom iz mjesta Kapo d'Orlando, u provinciji Mesina na Siciliji, ali je dugo živio u Ređo Emiliji, gdje je već dvadeset godina vodio piceriju.
Njegova sestra je hospitalizovana u bolnici Santa Maria Nuova, gdje se nalazi na liječenju.
