Holandija i Norveška sada su bodovno izjednačeni na vrhu tabele sa po 13 bodova. Turska ima 11, dok je Crna Gora propustila priliku da nakon šestog kola izađe na dvocifren broj bodova, tako da ih sada ima osam.
Turska je deklasirana u Amsterdamu, pri čemu je to ujedno bio i njihov prvi poraz u kvalifikacijama.
Holandija je povela već u prvom minutu igre. Bila je to jako lijepa akcija, na čijem je kraju Depaj lijepo asistirao Klasenu, koji se, nakon prošlonedjeljnog duela u Oslu, još jednom upisao u strijelce.
Kroz 15 minuta, bilo je 2:0. Ključni akteri su bili isti, ali u različitim ulogama - Klasen kao asistent, a Memfis Depaj kao strijelac, pri čemu je to učinio na izuzetno efektan način.
Da će Turska definitivno upisati prvi poraz u kvalifikacijama, postalo je jasno u 38. minutu, kada je Depaj iz penala postigao svoj drugi večerašnji gol.
I u nastavku je Depaj nastavio istim tempom, pa je u 54. minutu došao do het trika. U 80. minutu, potpuni debakl Turaka - u strijelce se tada upisao i rezervista Gus Til. Na uvodu u sudijsku nadoknadu, bilo je 6:0. Ovog puta, pogodak je postigao Malen.
Počasni gol za Tursku dao je Čengiz Under u drugom minutu nadoknade.
Očekivano ubjedljiva bila je Norveška protiv Gibraltara, kojoj su bila potrebna 23 minuta da slome otpor suparnika. Tada je Torstved doveo domaće u vođstvo, a četiri minuta kasnije bilo je 2:0, pri čemu je ovog puta precizan bio Haland. Isti igrač je u 39. minutu postigao još jedan pogodak. U finišu prvog poluvremena, gosti su prvi put šutnuli u okvir gola, i to precizno - strijelac je bio Stič.
U drugom poluvremenu, Sorlot je povećao na 4:1. Konačan rezultat postavio je Haland, koji je time upisao i het-trik.
Rezultati:
Crna Gora - Letonija 0:0
Holandija - Turska 6:1
(1:0 - Klasen 1', 2:0 - Depaj 16', 3:0 - Depaj 38' (11m), 4:0 - Depaj 54', 5:0 - Til 80', 6:0 - Malen 90', 6:1 - Čengiz Under 90+2')
Norveška - Gibraltar 5:1
(1:0 - Torstved 23', 2:0 - Haland 27', 3:0 - Haland 39', 3:1 - Stič 43', 4:1 - Sorlot 59', 5:1 - Haland 90+3')
