Policija u Koblencu potvrdila je da je zapaljeni meteorit pao na kuću i da su vatrogasci i policija brzo došli na lice mjesta, ali je utvrđeno da nema dalje opasnosti, piše DW.
Pojava meteora izazvala je veliki broj poziva službama za hitne slučajeve širom zapadne Njemačke, jer je bio vidljiv u saveznim pokrajinama Rajna-Palatinat, Severna Rajna-Vestfalija, Hesen, Sarland, Baden-Virtemberg i Donja Saksonija.
Svjedoci su opisali svijetlu vatrenu loptu praćenu glasnim praskom, a viđenja su prijavljena i u susjednim zemljama - Belgiji, Francuskoj, Holandiji i Švajcarskoj.
Zvaničnici su naglasili da nema naznaka da je u pitanju bezbjednosni incident i isključili su svaku vezu sa vojnim aktivnostima. Meteori su bljeskovi svjetlosti koji nastaju sagorijevanjem meteorida u Zemljinoj atmosferi. Fragmenti koji prežive putovanje i stignu do tla nazivaju se meteoriti.
Takvi udari meteorita su izuzetno rijetki. U aprilu 2023. godine, nekoliko fragmenata je palo u blizini Elmšorna u sjevernoj Njemačkoj, uključujući komad od 3,7 kilograma, koji se smatra najtežim meteoritom pronađenim u toj zemlji u posljednjih sto godina.
