Fudbaleri Liverpula neporaženi su u Premijer ligi i nakon 20. meča koji su odigrali u okviru 21. kola. Ekipa Jirgena Klopa slavila je 2:0 protiv Šefild junajteda na svom Enfildu.
Poveli su Redsi već u četvrtom minutu nakon sjajne kontre iz koje je Endi Robertson odlično pronašao Mohameda Salaha koji loptu šalje u gol za 1:0.
Igrao se 15. minut kad je Lundstram zatresao mrežu domaćih, ali je linijski sudija već prije njegovog šuta podigao zastavicu i pokazao da je igrač Šefilda u ofsajdu.
Šanse Liverpula su se nizale jedna za drugom, ali je odličan na svom golu bio Din Henderson. U jednoj situaciji pomogla mu je i stativa, ali je minut kasnije ostao nemoćan pred Sadiom Maneom koji je pogodio za 2:0.
Liverpul ima 58 bodova na prvom mjestu na tabeli, 13 više od Lestera i 14 više od Mančester sitija uz utakmicu manje od dva najbliža rivala. Šefild je doživio šesti poraz i na osmom mjestu na tabeli ima 29 bodova.
Liverpul u 22. kolu gostuje Totenhemu, a Šefild će ugostiti Vest Hem. Prije toga će Redsi igrati Mersi sajd derbi u FA Kupu.