Francuski tužioci zatražili su danas od suda u Parizu da bivši predsjednik države Nikola Sarkozi ponovo ode u zatvor, ovaj put na sedam godina, i da plati kaznu od 300.000 eura zbog sumnje da je ubijeni libijski vođa Moamer el Gadafi tajno finansirao njegovu uspješnu predsjedničku kampanju iz 2007. godine.
Prethodno je bivši francuski predsjednik pušten na uslovnu slobodu, bez obaveze nošenja elektronskog nadzora.
0Sarkozi (71) osuđen je u septembru 2025. godine na pet godina zatvora zbog zavjere radi izvršenja krivičnih djela, čime je postao prvi francuski predsjednik u modernoj istoriji koji je otišao u zatvor.
Sarkozi se suočio poslednjih godina sa više suđenja zbog korupcije, ali predmet sa Libijom nosi daleko najteži politički i simbolični značaj, jer se njime tvrdi da je strana diktatura pomogla predsjedničkom kandidatu u Francuskoj da dođe na vlast.
Sarkozijev advokat tvrdi da su optužbe koje su tužioci danas iznijeli pred sudsko vijeće "striktno identične" sa onima koje su finansijski tužioci iznosili na prvom suđenju - bez uspjeha.
„Nikakvog libijskog novca nije bilo u njegovoj kampanji, u njegovoj imovini. Nikola Sarkozi je nevin, i to ćemo demonstrirati za 15 dana“, rekao je advokat Kristof Ingren.
