Stoga se sada postavlja pitanje što je tačno pandemija, kako se razlikuje od epidemije i što će se dogoditi ako se koronavirus proglasi pandemijom.
Što je pandemija?
Pandemija nije povezana s težinom bolesti ili stopom smrtnosti, već s geografskim širenjem. Prema Svjetskoj zdravstvenoj organizaciji, pandemija se proglašava kada se nova bolest, za koju populacija nije razvila imunitet, počinje ubrzano širiti svijetom.
Da bi se iz epidemije prešlo u pandemiju, mora doći do drugog talasa zaraze. Na primjer, turista koji se zarazio u Kini, a simptome dobio u drugoj zemlji ne spada pod kategoriju moguće pandemije. No, ako se virus počinje širiti u nekoj zemlji između osoba koje nijesu bile u Kini ili u dodiru s nekim ko je putovao u tu zemlju, radi se o matičnom širenju koje se može proglasiti pandemijom.
Kada se proglasi pandemija, to znači da će vrlo vjerovatno doći do širenja zaraze u drugim zajednicama te vlade i zdravstveni sistemi moraju biti pripremni na takvo izvanredno stanje.
Epidemija je, s druge strane, nagli porast slučajeva oboljenja koji može biti jedinstven za jednu zemlju ili zajednicu, piše The Guardian.
Kada se proglašava pandemija?
Epidemiološkinja Meri-Luis Meklouz, koja je neko vrijeme radila kao savjetnica za SZO, rekla je kako su smjernice za proglašavanje pandemije pomalo nejasne jer zavise od modela koji se mogu razlikovati između SZO-a i drugih zdravstvenih organizacija.
"No, postoji prag koji se ne smije preći i u tom slučaju SZO ipak ima posljednju riječ. Na primjer, SARS se pojavio 2003. godine. Mada je pogodio 26 zemalja, njegovo širenje se vrlo brzo obuzdalo te SZO nije proglasio pandemiju“, kazala je Meklouz.
"SZO proglašava pandemiju kako bi se simptomi zaraze shvatili ozbiljno i kako bi se mogle osigurati finansije za obuzdavanje širenja zaraze. Međutim, ponekad takva odluka može izazvati nepotrebnu paniku. Puno se pisalo o tome je li bilo potrebno H1N1, odnosno svinjsku gripu, proglasiti pandemijom jer je tada došlo do nepotrebne panike, vlade su prekomjerno trošile na antivirusne ljekove, a hitne službe su bile neopravdano preplavljene“, objasnila je.
Što će se dogoditi ako STO proglasi koronavirus pandemijom?
Trenutno je zabilježeno lokalno širenje koronavirusa u Kini, Južnoj Koreji, Japanu, Iranu, Italiji i Singapuru. Uprkos tome, SZO za sada ne smatra da se radi o pandemiji.
"Za sada nije došlo do nekontroliranog širenja ovog virusa po svijetu i nema velikih razmjera smrtnih slučajeva ili hroničnih oboljenja“, rekao je prekjučer Tedros Adhanon Gebrejesus, direktor SZO-a.
"Može li ovaj virus prerasti u pandemiju? Apsolutno. Je li se to već dogodilo? Po našoj procjeni, još ne", dodao je.
Epidemiolog Najdžel Mekmilan s instituta Menzies Health u Kbinslendu kazao je kako ga brinu medijski izvještaji koji previše senzacionalistički pišu o tome što pandemija zapravo znači.
"Ne želimo pokrenuti lavinu paničnog skladištenja hrane ili benzina ako će 95% stanovništva bolest doživjeti kao laganu prehladu", rekao je.
Pandemija bi takođe značila da zabrane putovanja više nijesu efikasne i da se zdravstvene institucije trebaju pripremiti za sljedeću fazu.
"To uključuje pripremu lokalnih bolnica za veliki priliv pacijenata, skladištenje svih antivirusnih ljekova i savjetovanje građanima da izbjegavaju velika okupljanja i da ostanu kod kuće“, rekao je Mekmilan.
Proglašavanje pandemije ukazuje na to da se virus više ne nalazi samo u određenim regijama ili zemljama i da bi bilo dobro da zemlje preusmjere fokus s mjera osiguranja, poput pretjerano restriktivnih karantina, na liječenje pacijenata s koronavirusom.
Dosadašnje pandemije: H1N1 (2009.), HIV (1981.), španska gripa (1918.), boginje (1870) i kuga (1347.).
