„Ombrela“ (kišobran) – frakcija od čak 45 poslanika, visokih stranačkih zvaničnika i uticajnih članova, koju predvodi Euklid Cakalotos, bivši ministar finansija tokom Sirizine vlade 2015-19, najavila je odlazak oštrom izjavom u kojoj je lider stranke, bivši američki biznismen Stefanos Kaselakis (35) optužen za „trampovsku praksu desničarskog populizma“.
Nekada dominantna, ta stranka se rašiva još od teškog poraza od konzervativne Nove demokratije na poslaničkim izborima održanim ove godine dvaput – u maju i junu.
Već u opoziciji od 2019. godine, Siriza se nadala da će povratiti vlast, ali su je glasači odbacili, te je na posljednjim izborima pala na 17,8 odsto, a vladajuća Nova demokratija pobijedila sa 40,6 odsto, što je dugogodišnjeg lidera Sirize Aleksisa Ciprasa navelo na ostavku poslije 15 godina.
Podjela zapečaćena u nedjelju poslije višenedjeljnih kritika unutar stranke na račun lidera, postala je neizbježna posljednjih dana, kada je Kaselakis insistirao da želi da izbaci četiri istaknuta člana frakcije „Ombrela“, sve bivše ministre.
Kada je postalo jasno da to neće proći u partijskim organima, Kaselakis je zaprijetio da će to pitanje staviti na referendum članova stranke.
Taj predlog je izazvao osudu čak i među njegovim saveznicima. Na burnoj sjednici Centralnog komiteta stranke u subotu Kaselakisov svađalački govor je prekidan zvižducima i povicima „Sramota!“. Sjednicu su napustili „Ombrela“ i pristalice Efi Ahcioglou, Kaselakisove glavne rivalke na septembarskim izborima vođe stranke.
Kaselakis je tada pobijedio na stranačkim izborima, a uslijedili su poslije još jednog poraza Sirize, trećeg ove godine – ovog puta na regionalnim i lokalnim izborima u septembru. Politički novajlija i državljanin SAD grčkog porijekla, bez veze sa strankom prije no što je postao kandidat za majske poslaničke izbore, Kaselakis je „pao s neba“, a uspeo se na stranački vrh. Iznio ga je njegov četvorominutni video u kojem je vješto ispričao svoju životnu priču i pretvorio ga u favorita.
Kaselakisov stil, zasnovan na neprekidnoj aktivnosti na društvenim mrežama i na harizmi, i njegova prošlost „osviješćenog“ bivšeg trgovca dionicama u američkoj banci „Goldman Saks“ i brodovlasnika, naljutili su ljevičare stare škole koji su osuđivali i neke od njegovih stavova, kao što je zalaganje da zaposleni dio plate dobijaju u berzanskim akcijama, kao i njegova ukupna ideološka nedorečenost.
Otvoreno su ga ismijavali zbog njegove sanjalačke „post-politike“ – zalaganja za „organizacije bez orgnaizacije i strukture“ i stvaranje „harmoničnog društva bez sukoba“ uz opšti „ideloški knsensus“, a jedna istaknuta stranačka ličnost ga je čak uporedila s bivšim predsjednikom SAD Donaldom Trampom i italijanskim komičarem Bepeom Grilom, osnivačem populističke političke partije.
Pristalice novog lidera su zauzvrat optužile rivale da su se urotili da potkopaju bivšeg lidera Ciprasa uoči katastrofalnih izbora, a da su to radili čak i godinama ranije.
Nevolje Sirize su pojačala istraživanja javnog mnjenja koja pokazuju da je ona, iako dosad nesumnjivo vodeća među opozicijom po podršci javnog mnjenja, sada već u tijesnoj trci sa starom socijalističkom partijom PASOK za drugo mjesto na grčkoj sceni, te ide naniže.
Iako pristalice „Ombrele“ nisu razjasnile šta planiraju, očekuje se da će formirati novu ljevičarsku političku stranku, a već imaju podršku odmetnute većine iz Sirizinog omladinskog krila.
Ahcioglu koja predvodi sopstvenu frakciju „6+6“, odlučila je da zasad ostane u Sirizi, ali su njeni odnosi s liderom zatrovani. Ona i njena grupa objavili su zasebnu izjavu u nedjelju, poslije odlaska ljevice, u kojoj kritikuju Kaselakisov „duboko uvredljiv govor koji izaziva podjele“ i optužujući ga da koristi „rečnik alt-desnice“.
Kako sada stvari stoje, ne može se isključiti dalji raspad stranke.
