Poglavar Rimokatoličke crkve je to rekao na kraju nedjeljne audijencije, prve poslije jednomjesečne ljetnje pauze.
Podsjetivši na sjutrašnju godišnjicu papa je rekao da se moli za porodice žrtava "katastrofalnog događaja i dragi libanski narod".
"Molim se da svako može da nađe utjehu u vjeri i pravdi i istini koja se nikada ne može sakriti", rekao je on.
Prije dvije godine eksplodiralo je gotovo 3.000 tona visokoeksplozivnog materijala, amonijum nitrata, koji se koristi kao đubrivo, nepropisno uskladištenog u luci u glavnom gradu Libana.
Bila je to jedna od najvećih nenuklearnih eksplozija u svijetu u kojoj je poginulo 215 ljudi, a više od 6.000 je ranjeno i razoreni su djelovi Bejruta.
Istraga eksplozije je već mjesecima blokirana, jer su libanski političari osigurali da do sada niko ne bude pozvan na odgovornost.
Mnogi Libanci za tragediju krive dugogodišnju korupciju vlasti i loše upravljanje.
Papa Franjo pomolio se da se Liban ponovo rodi i da bude istinska "zemlja mira i pluralizma gdje različite zajednice mogu da žive u bratstvu".
Osamdesetpetogodošnji papa planirao je da posjeti Liban prošlog proljeća, ali je zbog povrede koljena odložio put, a novi datum nije određen.
