Primjedbe, objavljene na Twitteru u 1 ujutro u nedjelju, izazvale su političku pometnju i razdor unutar ratnog kabineta Netanjahua koji je suočen s kritikama jer nije preuzeo odgovornost za obavještajne i operativne neuspjehe u vezi s Hamasovim napadom na jug Izraela.
Dok su najviši zvaničnici - od čelnika vojske i unutrašnje obavještajne službe Shin Bet do ministra finansija - preuzeli odgovornost za neuspjehe, Netanjahu to nije učinio. On je samo rekao da će nakon rata biti vremena za postavljanje teških pitanja, uključujući i o njegovoj odgovornosti.
Portparol izraelske vojske, upitan o Netanjahuovim komentarima tokom dnevnog brifinga s novinarima, odbio je odgovoriti, istakavši: "Sada smo u ratu, usredsređeni na rat."
Izraelski zvaničnici rekli su da će se istražiti događaje koji su doveli do samog napada Hamasa, ali da je trenutni fokus na sukobu.
"Ni u jednom trenutku i ni u jednoj fazi premijeru Netanjahuu nije dato upozorenje u vezi s ratnim namjerama Hamasa. Naprotiv, svi bezbjednosni zvaničnici, uključujući šefa vojne obavještajne službe i šefa Shin Beta, procijenili su da je Hamas odvraćen i zainteresovan za dogovor", napisao je Netanjahu u objavi na Twitteru koja je u međuvremenu izbrisana.
U drugoj objavi na Twitteru, oko 10 sati kasnije, Netanjahu je napisao: "Bio sam u krivu". Napomenuo je da njegove primjedbe "nijesu trebale biti iznesene". "Izvinjavam se zbog toga", zaključio je. "Dajem punu podršku svim čelnicima bezbjednosnih grana", dodao je.
Netanjahuove početne komentare brzo su ukorili sadašnji i bivši saveznici, uključujući Benija Gantza, bivšeg ministra odbrane koji je sada u Netanjahuovoj ratnoj vladi.
Gantz je na Twitteru napisao da bi Netanjahu trebao povući ono što je rekao. "Kada smo u ratu, vođstvo mora pokazati odgovornost, odlučiti učiniti prave stvari i podržati snage tako da mogu izvršiti ono što od njih zahtijevamo", rekao je Gantz.
Dobro planirani iznenadni napad Hamasa bio je najsmrtonosniji za Izrael u njegovoj 75-godišnjoj istoriji. Izrael je od tada bombardovao Pojas Gaze razornim vazdušnim napadima i započeo kopnene operacije s ciljem svrgavanja islamističke oragnizacije, koju podržava Iran, te vraćanja mnoštva zarobljenika otetih iz Izraela.
