Kamačo je imao 50 godina, a pogođen je metkom u lice u noći između utorka i srijede dok je sjedio u automobilu ispred jednog bara u gradu Bajamon. Njegov saputnik je ubijen. Kamačo je od srijede bio na aparatima za održavanje života, a u četvrtak mu je konstatovana moždana smrt.
Legendarni šampion u tri kategorije rođen je u Bajamonu i bio je poznat po raskošnom talentu, sjajnoj vještini u ringu, ali i burnim privatnim životom i problemima sa alkoholom. Tokom druge polovine osamdesetih i početkom devedesetih godina važio je za jednog od najboljih boksera, a najveći rival u to doba mu je bio legendarni Meksikanac Hulio Sesar Čaves, koji ga je pobijedio kada su se konačno sastali 1992. godine.
Dok je bio u vrhu borio se sa najboljima u dvije generacije, među kojima su i legende ringa ‘Šugar’ Rej Leonard, Feliks ‘Tito’ Trinidad, Oskar De La Hoja, Roberto Duran i Čaves.
Čaves je rekao da mu je Kamačo bio jedan od najboljih prijatelja u ringu, kao i da je bio jedan od najboljih boksera svih vremena i inovator.
“Tužno je to što se desilo. Bio mi je veliki prijatelj, iako smo bili rivali, iako postoji veliko rivalstvo između Meksika i Portorika. Mislim da mi je on najbolji prijatelj od svih boksera sa kojima sam se borio”, rekao je Čaves, “Bio je jedan od najboljih svih vremena. Unio je revoluciju u boks. Bio je jako harizmatičan i kontroverzan. Pričljiv, ali jako dobar, jako brz. Kao osoba je bio pristupačan, ali je često upadao u nevolje zbog svoje ličnosti. Sve što mogu da kažem je da smo bili veliki prijatelji”.
