Rusija je tokom noći napala Kijev balističkim raketama, a u ukrajinskoj prijestonici odjeknulo je više eksplozija. Prema prvim informacijama, pogođeni su Sjeverni i Južni most, javlja ukrajinska novinska agencija UNN, pozivajući se na ukrajinsko ratno vazduhoplovstvo, gradonačelnika Kijeva Vitalija Klička i druge izvore.
U 23:36 u Kijevu je proglašen najviši stepen vazdušne opasnosti. Ukrajinsko ratno vazduhoplovstvo upozorilo je da se prema gradu kreće balistička raketa, a ubrzo nakon toga čule su se eksplozije.
"Snage protivvazdušne odbrane djeluju u prijestonici. Kijev je pod balističkim napadom. Ostanite u skloništima!“, poručio je Kličko.
Kasnije je objavio da su, prema prvim informacijama, pogođeni Sjeverni i Južni most. Za sada nije poznato u kojoj mjeri su oštećeni.
Prema nezvaničnim informacijama, ruske snage su istovremeno izvele napade iz Rostovske, Voronješke, Kurske i Brjanske oblasti.








