Koncert će biti održan ispred dvorane Topolica, u organizaciji opštine i TO Bar, a Džiboni ističe kako je prvi put u našem lučkom gradu nastupao još 1998. godine.
"Super mi je bilo. Sjećam se, ali slabo, jer sam tek imao 19 godina i to mi je bio jedan od posljednjih nastupa sa ondašnjim bendom. Možda čak i predzadnji. Imali smo odličan koncert, bilo je puno ljudi. U Crnoj Gori sviram već dosta, gledam da ne dolazim u isti grad sa istim programom. Ipak, s obzirom na to da se više volimo sretat, nego što sam ja u stanju napisati novih pjesama teško se držati tih svojih principa", dodaje on.
Ističe kako će večerašnji koncert biti za pamćenje.
“Došao sam tu sa možda i najjačom ekipom, tu su moja tri duvača, tri prateća vokala, perkusionista, violinista, klasičan bend, došla mi je moja pjevačica iz Los Angelesa, došao mi je moj jedan prijatelj – Dado Urban, da sve to malo zajedno uskomeša, da bude koliko god bude moglo maksimalno. Ne volim govoriti hop prije nego skočim, ali sve što smo mogli i što je u našoj moći smo napravili. Čekamo večeras i reakciju publike,” naveo je on.
Večerašnji koncert počeće u 21 čas.
