Do 89. minuta titulu u rukama držao jedan tim, do 94. drugi, a na kraju je osvojio - treći

Na kraju sezone, Antverpen je imao 47 bodova, a Genk i Sen Žil 46.

No, ni to ne bi bilo toliko čudno da do 89. minuta Sen Žil nije teoretski imao titulu u rukama, a do 94. ekipa Genka. Na kraju, Tobi Aldervejreld je u finišu nadoknade Antverpenu donio naslov.

Sen Žil je do 89. minuta imao titulu u rukama, jer je pred svojim navijačima vodio 1:0 protiv Briža. No, gosti su od tada postigli čak tri pogotka, te je na kraju bilo 1:3.

Vijest iz finiša utakmice Sen Žil - Briž obradovala je fudbalere Genka, koji su u tom momentu vodili 2:1 protiv Antverpena. Slavlje je polako počinjalo na tribinama, a onda se u sekundi sve promijenilo - Tobi Aldervejreld je u četvrtom minutu nadoknade izjednačio na 2:2, te je Genk ostao bez naslova, a Antverpen stigao do pete titule, no prve od 1957. godine.

Antverpen je najstariji belgijski klub, a sa klupe ih predvodi Mark van Bomel.