Američke savezne sudije odbacile su tri tužbe u kojima se poznati pisac fantastike Nil Gejmen optužuje da je prije četiri godine na Novom Zelandu seksualno napastvovao dadilju svoje djece.
Kako je prenio Guardian, Skarlet Pavlovič je u februaru 2025. u Viskonsinu podnijela tužbu protiv Gejmena i njegove supruge Amande Palmer, optužujući Gejmena za višestruke seksualne napade tokom perioda kada je 2022. radila kao dadilja u njihovoj porodici. Istog dana podnijela je i tužbe protiv Palmer u Masačusetsu i u Njujorku.
0Gejmen ima kuću u sjeverozapadnom Viskonsinu, dok Palmer živi u Masačusetsu. Pavlovič je u maju zatražila da povuče njujoršku tužbu protiv Palmer, objašnjavajući u sudskim dokumentima da je postupak u toj saveznoj državi pokrenula zato što se Palmer nedavno preselila iz Njujorka u Masačusets i da nije bila sigurna koja država ima nadležnost. Savezna sudija SAD Meri Kej Viskosil u Njujorku odobrila je taj zahtev u junu.
Pavlovič je u maju povukla i dio tužbe u Viskonsinu koji se odnosio na Palmer, a savezni sudija SAD Džejms Piterson u Medisonu odbacio je ostatak tužbe u oktobru, navodeći da Pavlovič mora da vodi postupak na Novom Zelandu. Savezni sudija SAD Nejtanijel Gorton u Bostonu odbacio je tužbu podnijetu u Masačusetsu u petak, iz istih razloga.
Advokati Pavlovič nisu odgovorili na mejlove agencije Associated Press u kojima je u ponedjeljak tražen komentar. Advokati navedeni kao zastupnici Gejmena i Palmer takođe nisu odgovorili na poruke.
Pavlovič je u tužbama navela da je imala 22 godine i da je bila bez doma kada je 2020. upoznala Palmer u Oklandu. Palmer je pozvala Pavlovič u porodičnu kuću para na ostrvu Vajheke, a ona je vremenom postala dadilja njihovog sina, navodi se u sudskim spisima.
Pavlovič je u tužbama navela i da ju je Gejmen seksualno napastvovao u noći kada su se upoznali, u februaru 2022. Napadi su se nastavili, prema navodima iz podnesaka, ali je ona nastavila da radi za par jer je bila bez novca i doma, a Gejmen joj je rekao da će joj pomoći u spisateljskoj karijeri.
Napadi su konačno prestali kada je Pavlovič rekla Palmer da namjerava da se ubije, stoji u sudskim dokumentima.
Pavlovič je dalje navela da je Palmer znala za Gejmenove seksualne sklonosti i da ju je svjesno izložila njemu, znajući da će je napasti. Tvrdila je da su Gejmen i Palmer prekršili savezne propise o zabrani trgovine ljudima i zahtijevala najmanje sedam miliona dolara odštete.
Gejmen je, nakon objavljivanja teksta u New York magazinu, izdao saopštenje u kojem je negirao da je ikada seksualno zlostavljao bilo koga.
Gejmenovi advokati su u zahtjevu za odbacivanje tužbe u Viskonsinu naveli da su Gejmen i Pavlovič imali kratak lični odnos koji je uključivao „sporazumnu fizičku intimnost“.
Policija na Novom Zelandu istražila je njene navode o seksualnom napadu i ocijenila ih kao neosnovane, navodi se u zahtjevu. Advokati su dalje tvrdili da su tužbe Pavlovič kulminacija plana da se Gejmen okleveta i da bi svi pravni sporovi trebalo da se rješavaju na Novom Zelandu, a ne u SAD.
