Pokazali ste da niste politička šmizla i da umijete imati i strpljenja i razumijevanja i demokratskog takta, ali i da umijete pokazati odlučnost, ili, što bi u mom selu rekli – kohones kada situacija to zahtijeva.
Prije prelaska na meritum, u preludijumu ove kolumne citiraću Poslanicu Svetoga Pavla Rimljanima. Ne zato što imam propovjedničkih sklonosti, nego zato da ne biste vrdali i pravdali se vjerskim pravima srbobogougodnika.
Sveti Pavle u Poslanici Rimljanima daje niz savjeta o pokoravanju vlastima i konstatuje da je ,,ljubav punoća zakona“:
1. Svaka duša da se pokorava vlastima koje vladaju, jer nema vlasti da nije od Boga, a vlasti što postoje od Boga su ustanovljene.
2. Zato ko se protivi vlasti, protivi se uredbi Božijoj a koji se protive primiće osudu na sebe.
3. Jer starješine nijesu strah za dobra djela nego za zla. Hoćeš li pak da se ne bojiš vlasti? Čini dobro i imaćeš pohvalu od nje.
4. Jer je sluga Božiji tebi za dobro. Ako li zlo činiš boj se, jer ne nosi mača uzalud, jer je Božiji sluga osvetnik, da izlije gnjev na onoga koji zlo čini.
5. Zato je potrebno pokoravati se ne samo zbog gnjeva, nego i zbog savjesti.
6. Jer zbog toga i poreze plaćate, jer su službenici božiji koji se time stalno bave.
7. Podajte, dakle, svakome što ste dužni: kome porezu – porezu, kome carinu – carinu, kome strah – strah, kome čast – čast.
8. Ne budite nikome ništa dužni osim da ljubite jedan drugoga; jer koji ljubi drugoga ispunio je zakon.
Dakle, ovo nije napisao ni patrijarh Pirinej, ni ministar Pažin, ni Amfy ni Joanikije nego Sveti Pavle. I ima da bude ovako. Ne interesuje me što ima da kaže Džomke ili Gojko Perović ili Marko Bato Carević ili Pipun i Manda i Dačić i Vučić... I, naravno, Džej.
I da se zna: gluposti o kojima ovi pričaju nisu kanoni nego - kanonada etnofiletističkog kleronacionalizma. Srbija je problem naduvala dotle da su se potencijalni turisti počeli bojati; ovog januara na mrežama drastično pao „early booking“, ili, da prevedem za talibane sa molebana, rane rezervacije u turizmu. I ne samo pao, nego i zastao. Čak su i upiti izostali.
Ne znam kako ministarstva o tome ništa ne znaju i ne pričaju, ali ovo vam mogu potvrditi mnogi turistički radnici sa Primorja. Zašto se to događa? Zbog šetača, odnosno srbowalkersa. Velike su šanse da će u slučaju nastavka ovoga cirkusa i predsezona, pa možda i sezona, da propadnu. Jer: izbori u Srbiji su u aprilu i ovo ima da traje, jer cijela svrha ove tarapane u našoj zemlji je dizanje rejtinga Vučiću pred izbore.
Nema nam druge, gospodine premijeru, nego pokažite im Pavlovu poslanicu i njihova prava po našim zakonima i zabranite teferiče. Ne brinite, još će da vas zavole. Ne vjerujete? Ima u njima neka sado mazo nota koja vjerovatno nastaje od postova i pokore i zbog toga vole grubijane.
Davnog 1938. ljeta Gospodnjeg, za regenstva princa Pavla Karađorđevića i Stojadinovićeve vlade, konjička policija je pendrecima izubijala i rastjerala „moleban“ SPC organizovan protiv potpisivanja konkordata sa Vatikanom. Toliko su ih ispremetali da je taj moleban nazvan krvava litija.
E, pedeset godina poslije toga, Amfy ljubi beton na pisti gdje je na surčinski aerodrom nogom kročio onaj dendy prestolonaslednik Karađorđević. Strah je, dakle, prenesen i na Amfy-ja koji nije bio u litiji 1938. god.
Znate vi bolje od mene, gospodine Markoviću, da turizam čini gotovo četvrtinu našeg BNP, a sa komplementarnim uslugama znatno više. Možemo li mi kao društvo i vi kao vlast dopustiti sebi da krahiramo u toj oblasti zbog raspadanja reda i poretka?
Znate da su zbog nemira propadale sezone i u mnogo jačim državama i sistemima od našeg, i da se nije lako povratiti poslije toga. Par loših sezona dovodi do pada zainteresovanosti potencijalnih investitora za ulaganja i porasta zaduženosti zemlje, pada kreditnog rejtinga i recesije. Zato reagujte odmah, zakonito i odlučno.
Najgore bi bilo da propadnemo zbog ovih zombija. I čuš, oni traže restituciju imovine koju im je oduzela socijalistička Jugoslavija, a ne pada im na um restitucija opljačkane imovine CPC i kulturnih spomenika i artefakata. Kao ne važi institut državine iz SFRJ a važi iz Kraljevine Jugoslavije. Svjati Bože, svjati krepki, svjati besmertni!
