Analitičari smatraju da je to učinjeno, jer su cijene nafte već duže vrijeme ispod nivoa potrebnog da održe potrošnju vlade. Sirova nafta se prodaje za manje od 60 dolara po barelu, a za stabilan saudijski budžet potrebno je između 80 i 86 dolara.
Novi ministar energetike je stariji polubrat 34-ogodišnjeg prestolonasljednika princa Mohameda bin Salmana i u zemlji važi za iskusnog u naftnoj industriji. On je bio državni sekretar za energetska pitanja od 2017. godine, ali se ne smatra bliskim s bratom, navodi AP.
Ovo je prvi put da neko iz vladajuće porodice Al Saud vodi važno ministarstvo energetike.
Princ Abdulaziz zamjenjuje Kalida al Faliha koji je samo nekoliko dana ranije smijenjen i sa mjesta predsjednika upravnog odbora državnog naftnog giganta Aramka, kompanije koju je nekad vodio kao generalni direktor. Nadležnosti Al Falihovog ministarstva su takođe nedavno smanjene kada su rudarstvo i industrija izdvojeni u novo ministarstvo.
Špekuliše se da Al Falih više nije po volji prestolonasljednika koji se zalaže da oslobodi saudijsku privredu zavisnosti od prihoda od nafte.
Al Falih, koji je bio ministar energetike od 2016, imao je ključnu ulogu u prinčevom ekonomskom preobraćanju zemlje. On je u januaru izrazio zabrinutost na energetskom forumu u Abu Dabiju zbog nestabilnih cijena nafte u posljednje dvije do tri godine.
Da bi zaustavio pad cijene nafte, on je izdejstvovao u okviru Opeka, kao i sa drugim vodećim proizvođačima, poput Rusije, dogovor o smanjenju proizvodnje nafte. Prema dogovoru, proizvodnja je ove godine smanjena za 1,2 miliona barela dnevno, od čega najveći dio otpada na Saudijsku Arabiju koja je vodeća u Opeku.
Saudijski kralj je ukazom smijenio i sadašnjeg zamjenika ministra energetike Abdulaziza al Abdulkarima i još nije imenovao novog.
Kralj je međutim imenovao Osamu bin Abdulaziza al Zamila za zamjenika ministra novog ministarstva za rudarstvo i industriju.
Ukazi su izdati rano jutros i objavljeni su u državnoj saudijskoj novinskoj agenciji.
