Prvu šansu u ovoj utakmici je imao Leonardo Paredes. On je u 12. minutu šutirao iz šesnaesterca ali je lopta prešla preko gola Alisona Bekera. Samo sedam minuta kasnije Gabrijel Žezus je zatresao mrežu Argentinaca i to na asistenciju Roberta Firmina.
Golu Žezusa je prethodio fantastičan pas Danija Alvesa na stranu za Roberta Firmina kao i dribling kojim je denis bek Brazila bacio na leđa defanzivca Argentine.
Novu dobru priliku Argentina je imala u 30. minutu kada je centrirao Leo Mesi iz slobodnog udarca, a Serhio Aguero je iz srca kaznenog prostora šutirao glavom pogodivši prečku.
Rezultatom 1:0 za Brazil je završeno prvo poluvrijeme poslije nekoliko polušansi na obe strane koje su rezultirale šutevima van okvira gola.
Utakmica je bila prilično izjednačena i u drugom poluvremenu kada je prvu priliku imao Lautaro Martines. On je u 50. minutu uputio prvi šut u okvir gola za Argentinu ali je brazilski golman lako odbranio šut.
Filipe Kutinjo je zatim poslije dodavanja Žezusa šutirao preko gola, a dobru šansu je ubrzo imao i Leo Mesi koji je u 57. minutu pogodio stativu Alisonovog gola.
U 66. minutu je Argentina imala drugi šut u okvir gola kada je Mesi probao iz slobodnog udarca, ali je Alison uhvatio živu loptu poslije solidnog udarca kapitena "gaučosa".
Samo pet minuta kasnije je stigla kazna za sve promašaje Argenitne kada je polukontru povukao Žezus, ispao je jedan defanzivac Argentine i špic Mančester Sitija je pronašao Firmina koji je bio potpuno sam i kome nije bilo teško da donese prednost Brazilu 2:0.
Komentari (0)
Želite da podijelite Vaše mišljenje sa čitaocima? Napišite komentar i započnite diskusiju.
