"Ovaj kukavički čin apsolutno je rezultat činjenice da je Crna Gora odavno nestabilno društvo, koje nema institucije sposobne i voljne da zaštite građane. I kriminalce je upravo ohrabrilo nečinjenje državnog aparata i nerješavanje prethodnih slučajeva napada na novinare. Policija, na primjer, nije u stanju da još uvijek pronađe počinioca krivičnog djela napada na poznatog srpskog novinara iz Crne Gore, Gojka Raičevića, gdje postoje svi dokazi, video zapis, broj vozila iz kojega izlazi nasilnik, vidi se udarac koji zadaje, pa ako ne može da se riješi nešto tako očigledno, onda teško možemo računati da je policija sposobna, ili da želi, da riješi ostale napade na novinare. Zato, u ovom trenutku, ne znamo koji nadležni organ da pozovemo da pod hitno riješi najnoviji atak na novinare, jer je aktuelna vlast snažno uvezana sa kriminalnim grupama", saopšteno je Portalu Analitika iz DF-a.
DF smatra da je krajnji momenat "za mobilizaciju svih onih koji hoće da se suprotstave kriminalcima i njihovim pomagačima iz režima".
