Japanac je poslije tri sata velike borbe uspio da ostvari prvu pobjedu nad top 10 igračem poslije više od godinu dana i Brizbejna 2017.
Njemu je to ujedno i prvo polufinale jednog Mastersa od Montreala 2016. godine.
Prvi je ozbiljnije zaprijetio Čilić već u drugom gemu meča kad je Nišikori uspio da poravna. Četiri gema kasnije Nišikori uspijeva da oduzme servis hrvatskom igraču i to je bilo dovoljno za prvi set.
Drugi je bio najuzbudljiviji jer je Čilić uspio da napravi brejk u četvrtom gemu i povede sa 3:1. Japanac se odmah vratio u narednom, da bi onda on poveo sa 5:4 i servirao za meč.
Čilić se 'vratio iz mrtvih' i brejkom za 5:5 odveo set u neizvjesnu završnicu, za koju u taj-brejku Japanac nije imao 'goriva'. Čilić je to iskoristio i sa pet vezanih poena došao do 7:1.
Taj nalet nije na pravi način iskoristio u narednom setu u kom je Nišikori iskoristio popuštanje Hrvata i poveo brejkom sa 5:3. Nakon toga nije ponovio grešku iz prethodnog seta i odservirao je za 6:3 i prvo polufinale Mastersa poslije skoro dvije godine.
Nišikori u polufinalu čeka boljeg iz okršaja Aleksandra Zvereva i Rišara Gaskea, dok je drugi polufinalni par Rafael Nadal i Grigor Dimitrov.
