Mančester Siti je bez ikakvih problema večeras na Vembliju slavio protiv Totenhema 3:1 i došao na korak do titule . Moći će je proslaviti već sjutra ako Junajted kiksa protiv Vest Bromvič Albiona.
Sitijevi navijači pobjedu u derbiju mogli su slaviti već nakon 25 minuta. U 22. je Gabriel Hezus doveo goste u vođstvo, a tri minuta kasnije je Ljoris skrivio penal i Gundogan je pogodio za velikih 2:0.
Totenhema nije bilo nigdje i do gola je u 42. minutu došao slučajno. Kejn je pokušao da proigra Eriksena, no Laport je u pokušaju da izbije loptu pogodio Danca u nogu i Totenhem je smanjio.
Međutim, u nastavku to nije ništa pomoglo Poketinovoj ekipi. Sparsi su se i dalje mučili, Eriksen i Ali nisu ništa uspjeli da odigraju prema Kejnu kojeg su gosti majstorski čuvali i bilo je samo pitanje vremena kad će Siti postići treći gol, a ne da li će Totenhem izjednačiti. Utakmicu je, nakon što je par minuta ranije promašio zicer, riješio Sterling u 72. minutu.
