Zbog požara koji je nakon ponoći buknuo u mjestu Tugare kod Omiša i proširio se na Srinjine prema Splitu, za saobraćaj je zatvoren put Srinjine-Sitno Donje.
Splitski vatrogasci su dojavu o požaru dobili 42 minute nakon ponoći.
U gašenju požara učestvuju sva dobrovoljna vatrogasna društva s područja Splita, Solina, Kaštela, Trogira i Omiša s 32 vozila i 109 vatrogasaca.
Gori borova šuma, nisko rastinje, makija i trava. Iako je zatražena pomoć iz vazduha, kanaderi još nijesu mogli da polete zbog jakog vjetra koji već danima duva na tom području.
Nema informacija o povrijeđenima i materijalnoj šteti, a na licu mjesta je i ekipa Hitne pomoći. Zbog vatre je isključen dalekovod Zakučac-Konjsko i Zakučac-Bilice.
Pola sata nakon tog požara planulo je i u Bogomolju na Hvaru, gdje gori gusta borova šuma. Taj požar gase sva tri dobrovoljna vatrogasna društva sa ostrva, a imaju pomoć i iz vazduha.
Požar kod Šestanovca s kojim su se vatrogasci borili cijelu nedjelju još gori, ali je vatra je pod kontrolom.
