Farma magaraca Martinići postoji skoro dvije godine a do sada je posjetilo preko 25.000 ljudi. Farma koja je ujedno i azil za deset magarica je prema riječima vlasnika Darka Saveljića, u novembru prošle godine bila planetarno proširena vijest.
''Za godinu i po dana doveli smo više od 25.000 ljudi da vide naše mage, samo u petak šest vrtića i oko 250 mališana. Nedjeljom nas posjeti oko 200 osoba, mahom porodičnih ljudi. Od tridesetak maga na Farmi, ona je azil za deset magarica koje su kupljene da ih ljudi ne bi mučili.Svi vodeći svjetski mediji pisali su o Farmi, uključujući i naslovnicu ''www.yahoo.com'' kada su fotografije naših magaraca bile tik uz Trampa i Klinton. Našu farmu u ljetnjim mjesecima posjeti na hiljade stranaca. Ugostili smo brojne ugledne ličnosti iz Crne Gore i svijeta, uključujući i većinu predstavnika diplomatskog kora u našoj zemlji'', govori Saveljić.
Kako Darko govori polovina proizvedenog mlijeka se donira, a njihova Facebook stranica broji preko 9000 članova.
''Polovinu ukupne proizvodnje mlijeka doniramo za najteže bolesti. Na desetine litara doniranog mlijeka vratilo je nadu pojedinim bolesnicima. Naša FB strana ima više od devet hiljada pratilaca sa dosegom pojedinih postova do 100 hiljada korisnika ove društvene mreže. Naveo bih da je cijena magarca prije otvaranja Farme u Crnoj Gori bila oko 25 eura. Danas se ne može kupiti ispod 150 eura. U cijeloj ih državi ima oko 150 jedinki sa tendencijom porasta, upravo zahvaljujući našoj Farmi. Ali bitno je napomenuti da su magarci i dalje jedna od najugroženijih životinjskih vrsta u Crnoj Gori'', kazao je Saveljić.
On dodaje da magareće mlijeko znatno pomaže osobama sa respiratornim problemima.
''Efekat mlijeka je fascinantan za ljude sa respiratornim problemima. Nekoliko asmatičara koji su bili zavisnici od pumpica danas su izliječeni ljudi. Kašalj (magareći kašalj) je već sitan problem za naše mlijeko'', kazao je Saveljić.
Svi ljudi koji žele posjetiti farmu magaraca mogu to uraditi nedjeljom od 10 do 13 časova.
