U susret 5. sezoni popularne "Igra prijestola" koja počinje da se prikazuje 12. aprila, Hrvatska se paralelno priprema za novu "najezdu" svjetskih zaljubljenika u TV seriju.
- Mnogi predviđaju da će se Hrvatskoj dogoditi scenario sa kojim smo se susreli na Novom Zelandu. Zbog snimanja Džeksonove trilogije "Gospodar prstenova" i "Hobita", Novi Zeland je samo prošle godine od tematskog turizma u državnu blagajnu "spremio" sedam miliona dolara. Efekat "Igre prijestola" na turizam Hrvatske i ekonomiju države već sad je ogroman - piše za "Forbes" novinarka Sesilija Rodrigez.
Talas takozvanog set-džeting turizma, motivisanog TV serijama i filmovima, eksplodirao je posljednjih godina. Uz Hrvatsku, zbog "Igre prijestola" turistički profitiraju i Španija, Sjeverna Irska, Island i Maroko.
Istraživanje fondacije Tourism Competitive Intelligence sprovedeno prošle godine otkriva da čak 45 miliona turista odabira odredište za odmor prvenstveno na osnovu lokacija viđenih u TV serijama i filmovima. Zato brojne turističke agencije svojim klijentima nude pakete ovakvog tipa tematskog turizma.
- U hrvatskoj turističkoj ponudi se, između ostalog, nalaze organizovani tematski obilasci lokacija poput Dubrovnika, splitske Dioklecijanove palate, tvrđave Klis i Nacionalnog parka "Krka", na kojima su snimljene brojne scene "Igre prijestola". Učinci set-džeting turizma osjete se u cijeloj Evropi, a turizam inspirisan "Igrom prijestola" rezultirao je većom posjećenošću srednjovjekovnih evropskih gradova i mjesta, kao i boljom mogućnošću iznajmljivanja dvoraca na Starom kontinentu - naglašava novinarka "Forbes"-a .
Izvor: T portal
