Izlazak na „jedno pivo“ sa društvom, Filipu Bojlu iz Midslboroa nije baš bio najpametniji potez. Naravno, gdje je jedno pivo, tu su i dva, tri, četiri...
Nakon ponoći, Bojl i njegov prijatelj Džejmi Blajt odlučili su da nastave izlazak kod njega kući. Usput su svratili do benzinske pumpe i dopunili zalihe piva.
Dok su sjedjeli kod Bojla kući, pričali su o odlasku na Tajland, što, obzirom na njihovo stanje, nije zvučalo kao suluda ideja.
„Džejmi me pitao da li imam kod sebe pasoš. Prvo sam pomislio da se šali, ali onda me podsjetio da imamo tamo nekoliko naših prijatelja. Bila je to loša ideja u 'pet do dvanaest', koja se odjednom pretvorila u odličnu ideju“, prisjeća se Bojl za list Evening Gazette.
Pokupili su šorceve i majice i otišli na aerodrom u Mančesteru. Poslije 11 sati i sa jednim presjedanjem u Abu Dabiju zakoračili su na Tajland.
Momci su na Tajlandu nastavili gdje su stali sa pićem u Midslborou, samo u toplijim vremenskim uslovima, neodoljivo podsjećajući na dešavanja u filmovima Mamurluk.
