Na stotine tijela, koja se ni ne mogu prebrojati, i dalje leže po šumi nakon napada koji su trajali od srijede do petka.
Majk Omeri, portparol nigerijske vlade, rekao je da se na meti napada našao grad Baga, na granici sa Čadom, gdje su pobunjenici zauzeli ključnu vojnu bazu 3. januara, a u srijedu su izveli nove napade.
- Bezbjednosne snage su brzo reagovale i izvele vazdušne napade na vojne mete -rekao je Omeri u saopštenju.
Načelnik tog distrikta Baba Aba Hasan rekao je da su žrtve pretežno djeca, žene i stariji ljudi koji nisu uspjeli da pobjegnu dovoljno brzo kada su pobunjenici upali u Bagu, ispaljujući granate i pucajući iz jurišnih pušaka na stanovnike.
Do sada je najsmrtonosniji napad koji je Boko Haram izveo u Nigeriji, bio napad izvršen 14. marta prošle godine na vojne barake u gradu Majduguri.
Amnesty International navodi da je, prema podacima sa satelitskih snimaka, toga dana ubijeno više od 600 ljudi.
U pobuni koja traje već pet godina, samo u 2014. ubijeno je više od 10.000 ljudi. Više od milion je raseljeno po Nigeriji, dok je na stotine hiljada pobjeglo preko granice u Čad i Kamerun.
